Gan groesi eu bysedd am haf bach Mihangel, mae staff Darganfod Awdurdod Parc Cenedlaethol Arfordir Penfro yn ôl wrth eu gwaith yr hydref hwn er mwyn helpu athrawon wneud y gorau o’r awyr iach yn eu gwersi.
Beth bynnag eich diddordeb – taith gerdded drwy’r coed, ymchwilio i’ch ochr greadigol yn Oriel y Parc yn Nhyddewi, neu fynd yn ôl mewn amser yng Nghastell Henllys neu Gastell Caeriw, mae gan Awdurdod y Parc Cenedlaethol rywbeth arloesol i blant ysgol o bob oed
“Yr hydref yw’r cyfnod delfrydol i blant fod yn yr awyr iach,” esboniodd Parcmon Darganfod y Parc Cenedlaethol Craig Stringer. “Mae popeth yn newid wrth i fyd natur baratoi’n lliwgar at dymor tawelach, ond mwy heriol, y gaeaf, ac mae’n darparu cynhaeaf ffrwythlon i fywyd gwyllt.
“Mae’n gyfnod gwych i blant ddod i ddarganfod, adeiladu, cwestiynu a chael hwyl.”
Yn dilyn hyfforddiant llwyddiannus mewn swydd i athrawon yn ddiweddar ceir dwy sesiwn newydd, Mathemateg Mwdlyd a Geiriau Gwyrdd, sydd bellach ar gael i grwpiau ysgol.
Mae’r sesiynau ysbrydoledig newydd wedi’u cynllunio i alluogi athrawon i fynd â gwersi rhifedd a llythrennedd i’r awyr agored, ac wedi’u datblygu o’r canllawiau pwnc newydd sydd wedi’u cyhoeddi i ysgolion.
Mae sesiynau’r Awdurdod ar gael mewn coedwigoedd, ar y traeth neu yn yr afon, yn ogystal ag yng Nghastell a Melin Caeriw a Bryngaer Oes yr Haearn Castell Henllys, sy’n cael eu rheoli gan Awdurdod y Parc.
Yma mae plant yn defnyddio Mathemateg neu Gymraeg a Saesneg i roi ystyr i fywyd yn Oes yr Haearn neu yng nghyfnod y Tuduriaid a deall pam fod cymaint o’r diwrnod yn cael ei dreulio yn gwneud dim mwy na goroesi.
Mae Mathemateg, Cymraeg a Saesneg yn gydrannau craidd yn y cwricwlwm cenedlaethol a nod y sesiynau hyn yw dangos i athrawon a disgyblion bod modd iddyn nhw gael eu cyflwyno mewn amryw o leoliadau, ond bod cyflwyno yn yr awyr agored hefyd yn cynnig rhywbeth newydd.
Ychwanegodd Craig: “Nid dysgu sgiliau’n unig yw diben y sesiynau hyn, ond hefyd eu defnyddio mewn lleoliad lleol sy’n hwyl ac yn ysbrydoli.”
I gael rhagor o wybodaeth am gyfleoedd dysgu dwyieithog gyda staff Darganfod Awdurdod y Parc yn yr amgylchedd allanol ar draws cwricwla llythrennedd, rhifedd, gwyddoniaeth a daearyddiaeth, cysylltwch â’r tîm: [email protected] neu 01646 624856.
